Kutsu-kutsu

Kutsu-kutsu Siling nila, hambal kuno, Ambot basta kuno-kuno, Indi ako, ginsugid ko lang, May kulang, may sobra, Wala mahibal-an Basta may kutsu-kutso Nga may kamatu-oran, May kutsu-kutso man Nga patu-patu lang! Hutik diri, hutik didto, “Atun-aton lang ini, Indi ka manugid bisan kay sin-o” Amo ini masami ang pauna Sang isa ka kutsukutsera Sa iya nga pagpa-ambit Sang isa ka kutsu-kutso. “Huo, sige, masaligan mo ako” Ini naman ang pangako Sang isa ka gusto mag-ambit Nga kutsu-kutsero. Kag ila saluhan ang isa ka kutsu-kutso, Nangakig, nagyubit, nagkadlaw, naghagikhik, Kailinit, kailinit…kanamit, kanamit, Indi sila daluk kay sang nahibaluan nagapaambit, Kutsu-kutso lang ugaling nga indi man tul-id! Pagtalikod ni kutsu-kutsera, Nasugata ni kutsu-kutsero ang isa pa, “Dali diri, atun-aton lang ini, Indi ka manugid, ha?” “Aba, huo, ano ina? Masaligan mo ako” Kag sila liwat nag-ambitanay sang ila Kutsu-kutso…. Sa pihak nga bahin, si kutsu-kutsera nga nagtalikod, Nakasugata man sang isa niya ka kaupod, “Dali diri, atun-aton lang ini” “Sige, ikaw sa sakon makasalig gid” Kag ang kutsu-kutso nga ila sugid, Nagbuhin, nagdugang, naglapta, Daw kagaw nga sa hangin ginbuga!