Kanta ni Matilda

Kanta ni Matilda Ako si Matilda Nga nagapuyo sa Ata Tierra. Pamatii ninyo ining akon estorya Nga makapagluyloy sang inyo mga abaga. Isa ako ka maestra Sa pampubliko nga elementarya. Mahuyugon sa manok kag baraha Ang wala obra ko nga bana. Tungod kay ang akon anak nga dalaga Sa sunod nga tuig college na Kinahanglan ko ang madmu nga kwarta Kay narsing nga kurso ang iya ginapuntirya. Naglakat ako sa Hong Kong para magpamutsatsa Ang natup-an ko nga Intsik nga ama Pareho lang kadaku sa singkit sini nga mga mata ang iya kasingkasing kag konsensya. Wala pa gani ako sa isa ka bulan nga nagaobra Nangimon sa akon ining akon ama Kay kuno ginadolodogsing ko ang iya bana. “Indi ina matuod!” siling ko sa iya, Pero tapat pa gid gani nga nangakig siya Kag wala gid ako pangaman, mga amiga, Nabatyagan ko na lamang ang halok sa akon guya Sang mainit nga plantsa.

Batasan sang Taga-uma

Batasan sang Taga-uma Richard Alayon ‘Ne, pahilog preparar sang panyaga kaya may bisita kita. Barkada ko ini sia sang ako nagiskwela pa sang kantutuhan sa banwa. Sugua anay si Dyunyor nga mag-utang sang isa ka kaha nga serbesa ditdto sa tyanggi kag isa ka kabu nga mani. Patya na lang dayon inang manok nga galumlum kag lakti sang ubad sang saging nga rusing. Sige, P’re kaon pa kag indi maghuya-huya kay bwas na lang kami maaway sang akon asawa. Indi na pagproblemahi Ang akon ulumhan Kay ang binhi Ibayad ko na lang Sa gin-inum ta.